Brazili ka kaluar me sukses provën e dytë në Botëror edhe pse me shumë vuajtje përballë Kosta Rikës. Brazilianët dominuan ndeshjen që nga minuta e parë por kundërshtari ishte përgatitur mirë në mbrojtje duke rreshtuar 5 lojtarë dhe një super Keylor Navas. Është Coutinho dhe në fund Neymar që shënojnë në këtë fitore mjaft të rëndësishme për djemtë e Tites.
Ndeshja nis në ritme të larta ku Neymar, Coutinho dhe Gabriel Jesus vënë në rrezik menjëherë portierin Navas, por pa sukses. Më pas Kosta Rika fillon të hidhet në sulm por pa e shqetësuar shumë Alisson, i cili dukej mjaft i qetë falë dyshes Miranda-Thiago Silva që kishte para. Neymar provon në të gjitha mënyrat të rrezikojë por kundërshtarët ia bëjnë mjaft të vështirë me ndërhyrje të parregullta. Brazili ka gjetur golin në minutën e 26-të, me Gabriel Jesus, por anësori ka anuluar gjithçka për një pozicion jashtë loje.
Në pjesën e dytë Tite kërkon ti japë më shumë shpejtësi dhe rrezxikshmëri sulmit dhe hedh në fushe Douglas Costan. Në të 72-ën, ka qenë Neymar që ka shkuar përsëri afër golit, me gjuajtjen e tij me hark që ka përfunduar për pak jashtë. Tetë minuta më vonë ka ardhur momenti që dukej se do të vendoste ndeshjen në favor të brazilianëve. Neymar është penguar në zonën e rreptësisë dhe arbitri Kuipers ka akorduar penallti, për ta ndryshuar vendimin e tij pas ndërhyrjes së “VAR”.
Brazili ka vazhduar të sulmojë dhe ka arritur të realizojë golin që i ka dhuruar fitoren në minutën e 91-të me Philippe Coutinho. Gabriel Jesus nuk ka arritur të kontrollojë një top të futur në zonën e rreptësisë, por ylli i Barcelona ka qenë në vendin e duhur dhe nuk ka falur Navas. Në minutat e mbetura, brazilianët kanë shënuar edhe golin e dytë me Neymar, i cili ka shpërthyer në lot në përfundim të ndeshjes.
Pas këtij rezultati, Brazili ka marrë kreun Grupit E me 4 pikë, teka në vendin e dytë është Serbia me 3 pikë, që do të luajë mbrëmjen e sotme kundër Zvicrës, që mban vendin e fundit me 1 pikë.
