Ish-ministri i LSI-së, deputet për Durrësin, Lefter Koka ka deklaruar se nuk ka arsye përse të djegë mandatin e tij parlamentar që ia kanë besuar zgjedhësit e tij.
Në një prononcim për “Bulevard”, ai ka sqaruar edhe arsyen se edhe pse është në krah të subjektit politik që përfaqëson, i qëndron besnik votuesve të tij:
“Lidhur me arsyet e paraqitura nga PD për djegien e mandateve të deputetëve të saj, nuk më duken arsye për të djegur mandatin tim. Vijoj të jem në krahë të subjektit politik që përfaqësoj dhe me çdo vendim që do marrë, por vijoj t’i qëndroj besnik atyre që më kanë zgjedhur deri në këtë pikë,”– ka thënë Koka.
LSI njoftoi dje vendimin për djegien e mandateve, ndërsa kryetarja e kësaj force politike deklaroi se i vetmi deputeti i LSI që nuk mori pjesë në mbledhjen ku u vendos për të djegur mandatet, ishte Lefter Koka.
E pyetur në “360 gardë” nëse vendimi ishte unanim ajo deklaroi: Përveç Lefter Kokës që nuk ishte në mbledhje, nuk tha se ishte kundër, por nuk ishte i pranishëm, të gjithë deputetët e tjerë ishin dakord.
