Deputeti socialist Erion Braçe, ka sulmuar sot në Kuvend Ministren e Bujqësisë, Frida Krifca. Ai foli në lidhje me ndarjen e kontratave për fermerët në zonën e Divjakës, për të cilat e akuzoi ministren për mos akordim të veprave me fjalët. Sipas tij, faturat për kontratat e qirasë së tokës nuk janë në të njëjtën vlera që vetë ministrja ka thënë. Gjatë interpelancës me të në Kuvend për situatën në bujqësi, Braçi solli në vëmendje disa kontrata, sipas së cilit janë ndryshe nga sa ministrja deklaron. Tejet i rebeluar, Braçe tha më tej se një ministri që nuk kontrollon territorin, kontratën, është i mbushur me njerëz dembël e pa ambicie.
“Ministre, po e citoj më ngadalë vendimin e Biden, meqë më parë e lexova shpejt. “Fermerët po shtrydhen”. Unë mendoj që është shumë mirë ta kapim nga këtej, ndërkohë që unë di nga ta kap. Do ta kap nga kontrata, por në dallim nga ju, do i referohem letrave qartësisht. Juve ju duket e habitur, por i kam dërguar një shkresë Ministrisë së Bujqësisë, ku kam marrë përgjigje nga Sekretari i Përgjithshëm dhe kam këtu përgjigjen, që ka diferencë nga ato që thoni ju. Do u’a lexoj unë, se ka diferencë.
Tani do rikthehem të bëj populistin prapë. E patë, u mundova shumë të rrija në realizëm, por nuk të lënë. Një ministër nuk mund të dijë çdo gjë përmendësh, por një ministri po. Një ministri që nuk kontrollon territorin, kontratën, ose është e mbushur me njerëz të painteresuar për punën, pa ambicie, ose është e mbushur me dembelë. Unë dembelët nuk i kuptoj, nuk përshtatem dot me ta, madje nuk i duroj dot fare.
Ministre, kontrata që iu referuat ju, nuk është në Lushnje siç thoni ju, por është në Divjakë. Nuk keni bërë asnjë takim, zero, për zgjidhjen e problematikave në Bashkinë Lushnjë. I keni marrë banorëve 40 mijë hektarë, por ajo tokë iu takon banorëve dhe pikë. Ja fotot e bëra dje, e nderuar ministre, kjo është toka, e papërdorshme për të paktën 3-4 vite. Një i fortë, kryetari i PD së zonës në Gradisht, ka mbjellur plepa, zonja ministre në një tokë buke. Të paktën, zv. ministrin tuaj e kam dërguar unë atje ta shikojë, kur isha zv.kryeministër. Ky është problemi në kontratën tuaj të Ministrisë së Bujqësisë. Kontrata me Agro Fish Hotin ka dështuar, jo prej Covidit, por prej kontraktuesit tuaj. Agro Fish Hoti nuk është më zonja ministre”, tha Braçe.
Kjo është interpelanca e dytë radhazi mes Braçes dhe Krifcës, lidhur me problemet në bujqësi.
