Pak ditë më parë, në media dhe opinionin publik bëri bujë një deklaratë e kandidates për deputete e Partisë Socialiste dhe njëherësh inxhineres së ndërtimit, Luljeta Bozo.
Në një emision televiziv, ajo u shpreh se koha e komunizmit kishte më shumë gjëra të mira se të këqija, duke ngjallur reagime të shumta.
Megjithatë, Bozo duket se ka ndërruar mendim, pasi në një intervistë të dhënë së fundmi në ”RTSH’’, ajo dënoi diktaturën komuniste dhe tha se Enver Hoxha ishte diktator.
Sipas saj, kush kapet pas Enverit për të sulmuar të tjerët është në fakt një zëdhënës i pavetëdijshëm i së keqes së asaj diktature.
Luljeta Bozo: “Unë kam një jetë të jetuar me parimet e me punën time dhe bindjet e mia as nuk i kam negociuar, as kam ndërmend t’i negocioj në këtë moshë me askënd! Për më tepër nuk kam ndërmend të merrem me ata që merren me shtrembërimin e fjalëve te mia, për qëllime të rëndomta politike. Diktaturën komuniste e dënoj me forcë dhe Enver Hoxha padyshim ishte një diktator. Por refuzimi i çdo relativizimi të krimeve të diktaturës, nuk më pengon dot të vlerësoj me respekt shkencëtarët dhe profesionistët e asaj kohe dhe gjithë popullin e thjeshtë që kanë punuar me ndershmëri.
Pafuqia për të mos e parë atë kohë vetëm bardhezi është sindromë e sërvilëve apo spiunëve të atëhershëm, që janë “xhelatët” e mendimit ndryshe të këtyre 30 vjeteve. Kush kapet pas Enverit për të sulmuar të tjerët është në fakt një zëdhënës i pavetëdijshëm i së keqes së asaj diktature. Ata që shajnë, akuzojnë dhe shtrembërojnë njësoj si xhelatët e mendimit ndryshe asokohe. Ekstremet përputhen dhe më kujtohet Vaclav Haveli që thotë: Komunisti më i zi është komunisti antikomunist! Kam vetëm keqardhje per ta.”
