Sa më shumë i afrohemi datës 30 qershor, aq më e tensionuar bëhet situata politike. Tashmë kemi një përplasje të qartë mes Kryeministrisë dhe Presidencës, teksa secila palë nuk tërhiqet nga qëndrimi i saj.
Presidenti shfuqizoi dekretin e zgjedhjeve, ndërsa Rama vijon fushatën elektorale, duke këmbëngulur se zgjedhjet do mbahen.
Madje, kryeministri nuk është kursyer aspak nga Metës, duke e sulmuar shpeshherë, teksa ka deklaruar ndër të tjera se po i shërben Berishës.
Sot, kanë vijuar përplasjet mes palëve, teksa Rama ka postuar disa vargje të Migjenit.
“Në varrimin e idhujve të vjetër kumbonat kanë për të plasë së ramit, minaret kanë për të thye kurrizin së faluni dhe zhrecvet do t’u këputen telat e fytit së kënduari. Dhe do të vijë heshtja. Se çdo vikamë fillon e mbaron me heshtje. Mbasandaj do të fillojë puna. “Idhuj pa krena” – Migjeni”, shkroi Rama në facebook.
Menjëherë pas këtij mesazhi të Ramës, ka ardhur një reagim nga zëdhënësi i Presidentit Ilir Meta, Tedi Blushi.
Ky i fundit ka sjellë në vëmendje vargjet e të madhit Migjeni, teksa shkruan shkurt: “Qeshur rini, qeshu! Bota është e jotja!”
