Themeluesi i “Thodex”, Faruk Fatih Ozer ka dalë sot para Gjykatës së Elbasanit për t’u njohur me masën e sigurisë, ndërsa Prokuroria e Elbasanit ka kërkuar “arrest me burg”. Ai ka kërkuar që të mos e ekstradojnë në Turqi, pasi i rrezikohet jeta. Madje Faruk Fatih Ozer është i bindur se e gjitha është një sulm politik.
“Ndaj meje është sulm politik. Mos më ekstradoni, më rrezikohet jeta në Turqi”, kështu ka thënë bosi turk i kriptomonedhave në seancën gjyqësore që po mbahet në Elbasan, ku do të njihet me masën e sigurisë.
Autoritetet turke kanë kërkuar ekstradim të menjëhershëm të 28-vjeçarit Faruk Fatih Ozer, i akuzuar për mashtrimin e mijëra qytetarëve në Turqi, teksa Prokuroria e Elbasanit dorëzoi këtë të enjte kërkesën për caktimin e masës së sigurisë “arrest në burg” deri në mbylljen e procedurave.
Ai u arrestua të martën në Himarë, ku po qëndronte me pushime bashkë me dy persona të tjerë nga Shqipëria, të cilët dyshohet se e ndihmuan të fshihej në vendin tonë.
