Kryeministri i Britanisë, Boris Johnson, ka njoftuar dorëheqjen e tij si lider i partisë Konservatore pas një vale dorëheqjesh të qeverisë. “Është e qartë tani vullneti i partisë parlamentare Konservatore, që të ketë një udhëheqës të ri të asaj partie dhe për rrjedhojë një kryeministër të ri”, tha ai të enjten.
“Kam rënë dakord me Graham Brady, kryetarin e deputetëve tanë, që procesi i zgjedhjes së udhëheqësit të ri duhet të fillojë tani. Dhe orari do të shpallet javën e ardhshme”.
“Kështu që dua t’u them miliona njerëzve që votuan për ne në 2019, shumë prej tyre votuan për herë të parë konservatorë. Faleminderit për atë mandat të jashtëzakonshëm. Shumica më e madhe konservatore, që nga viti 1987”, shtoi ai.
Mbrëmë, Johnson tha se kishte ndërmend të qëndronte dhe të luftonte. Por orteku i dorëheqjeve nga ministrat e qeverisë vazhdoi deri të enjten, me letër pas letre që kritikonte liderin e goditur nga skandali dhe i kërkohej Johnson të jepte dorëheqjen.
Largimi i Johnson shënon një rënie të jashtëzakonshme për një kryeministër, i cili dikur shihej se kishte superfuqi politike, me një thirrje që kapërceu linjat tradicionale të partisë. Ai mori një fitore dërrmuese në dhjetor 2019 me premtimin për arritjen e një marrëveshjeje Brexit dhe udhëheqjen e Mbretërisë së Bashkuar drejt një të ardhmeje të ndritur jashtë Bashkimit Evropian. Por premtimi e tij u shpërbë, si pasojë e pandemisë Covid-19.
Johnson është përballur me skandale të tjera të shumta që kanë goditur pozicionin e tij në votime – pavarësisht fitores së tij dërrmuese në zgjedhjet e përgjithshme me 80 vende, më pak se tre vjet më parë. Këto përfshijnë akuza për përdorimin e parave të donatorëve në mënyrë të papërshtatshme, për të paguar për një rinovim të shtëpisë së tij në Downing Street dhe urdhërimin e deputetëve që të votojnë në një mënyrë të tillë që do të mbronte një koleg që kishte shkelur rregullat e lobimit.
Burimi i lajmit: CNN. Pershtatur nga Tirana Today
