Kryeministri britanik, Boris Johnson, i cili vuajti nga koronavirusi për dy javë, tashmë është rikthyer në formën e tij më të mirë. Ai është i gatshëm të rimarrë detyrën e tij, duke punuar me orar të plotë.
Një ditë më parë, Boris Johnson u kthye në rezidencën e tij në Downing Street, pasi u shërua nga Covid-19. Mediat e huaja raportojnë se kryeministri britanik ka planifikuar që ditën e parë të punës t’ia dedikojë pikërisht strategjisë së daljes së vendit nga bllokimi.
Duke parë uljen e shifrave të viktimave dhe rasteve të reja të infektuara, Johnson mendon se është momenti i duhur, që të lehtësohen disa prej masave.
Gjithashtu ai do hartojë planin për rimëkëmbjen e ekonomisë. Johnson do të analizojë së bashku me zyrtarët e tjerë, se si dhe kur do të lehtësohet bllokimi, duke ruajtur kështu edhe sigurinë shëndetësore të qytetarëve.
