Kombëtarja shqiptare ka fituar një sulmues të klasit të lartë i cili është në pronësi të një skuadre të Serie A, Sampdorias por aktualisht luan si i huazuar te Venezia në Serie B. Quhet Giacomo Vrioni dhe është vetëm 19-vjeç, debutimi i tij me ngjyrat kuqezi ishte si një ëndërr. Luajti kundër ish-shokëve të skuadrës, pasi ishte pjesë e Itali U-17 dhe U-19, ndërsa tani u përball me ta dhe shënoi një supergol.
Vrioni pas debutimit me ngjyrat kuqezi ka dhënë një intervistë për mediat italiane. “Ia dedikoj golin babait tim Arben i cili ka qarë nga gëzimi në momentin që unë kam shënuar. Ai dhe mamaja ime janë shqiptarë dhe për mua të vishja fanellën e shtetit ku ata kanë lindur ishte një kënaqësi e papërshkrueshme. Grumbullimi me kombëtaren shqiptare të 21-vjeçarëve nuk ishte një surprizë për mua, edhe vitin e kaluar kam patur shumë kontakte me ta por vendosa të pres.
Kam dy pasaporta shqiptare dhe italiane dhe më herët kisha arritur të gjeja rrugën e rrjetës edhe me përfaqësueset e moshave U-17 dhe U-19 të Italisë. Të debutoja në të tillë mënyrë me gol ndaj Italisë ishte si një ëndërr për mua. Jam vërtetë shumë i lumtur tashmë shpresoj të shënoj në ndeshjen e radhës ndaj Beneventos pasi dua t’u dhuroj kënaqësi edhe tifozëve të Venezias”.
Të luash në një skuadër që pretendon vendet e para të Serie B në moshën 19-vjeçare nuk është pak. Për Giacomo Vrionin parashikohet një e ardhme e ndritur dhe nëse bën mirë me përfaqësuesen Shpresa të Shqipërisë gjatë viteve në vazhdim mund të vijë edhe grumbullimi në përfaqësuesen e madhe.
