Ish-presidentja e Bolivisë, Jeanine Anez u përpoq të vriste veten pasi prokurorët e akuzuan atë për “genocid” mbi vdekjen e protestuesve në vitin 2019, tha një zyrtar.
“Ne mund të themi, pa dyshim, se shëndeti i saj është i qëndrueshëm”, u tha gazetarëve të dielën Juan Carlos Limpias, drejtor i burgjeve.
“Për momentin, ajo është me familjen e saj në burg. Familja do të jetë një faktor i rëndësishëm për të ndihmuar në përmirësimin e gjendjes së saj mendore”, shtoi ai.
Carolina Ribera, vajza e Anez, tha se nëna e saj bëri një përpjekje për të vrarë veten të shtunën, për shkak të “depresionit të rëndë”, si pasojë e izolimit të saj të zgjatur.
Norma Cueller, avokati i Anez, u tha gazetarëve të shtunën se veprimet e ish-presidentes ishin një “thirrje për ndihmë”, dhe se “ajo ndihet shumë e ngacmuar”.
Anez, 54 vjeçe, u arrestua në fillim të këtij viti nën akuzat se ajo mori pjesë në një grusht shteti, për të rrëzuar ish-Presidentin Evo Morales në vitin 2019. Ajo i ka mohuar akuzat dhe thotë se është viktimë e persekutimit politik. Jeanine Anez është në burg, ndërsa pret gjykimin.
Përkrahësit e Anez mbajnë foton e saj dhe mesazhet spanjolle “Drejtësi për Jeanine”, “Liri për Jeanine Anez”, “Ju nuk jeni vetëm, Bolivia është me ju” dhe “Nuk kishte grusht shteti. Kishte mashtrim”, ndërsa ata protestojnë jashtë burgut të grave.
Të premten, Prokurori i Përgjithshëm Juan Lanchipa njoftoi akuzat për “genocid” kundër Anez për dy incidente në nëntor 2019, në të cilat 22 njerëz vdiqën në përleshjet me policinë. Viktimat ishin mbështetës të Morales.
Lanchipa tha se ai kishte paraqitur dokumente kundër saj, në të cilat incidentet “u klasifikuan përkohësisht si genocid, lëndime serioze dhe të lehta dhe lëndime të pasuara nga vdekja”.
Anez gjithashtu përballet me akuza për terrorizëm, kryengritje dhe komplot.
Opozita boliviane tha se shprehu keqardhje për trajtimin e qeverisë ndaj Anez, dhe bëri thirrje për lirimin e saj. Ish-presidenti Carlos Mesa kërkoi dhënien fund të “burgut politik” të saj dhe një hetim të pavarur për gjendjen e saj. Familja e Anez i ka kërkuar vazhdimisht qeverisë ta transferojë atë në një spital për trajtimin e hipertensionit dhe kushteve të tjera.
Anez erdhi në pushtet në nëntor 2019 pasi Morales dha dorëheqjen dhe iku nga vendi pas javëve të protestave të dhunshme mbi rizgjedhjen e tij kontroverse në një mandat të katërt jo kushtetues.
Ajo u betua si presidente e përkohshme, si parlamentarja më e lartë në atë kohë, por kundërshtarët e saj politikë e denoncuan këtë si një grusht shteti.
Nën administrimin e Anez, Bolivia mbajti zgjedhje paqësore dhe transparente në tetor 2020, në të cilat mbrojtësi i Morales, Luis Arce, mori një fitore bindëse.
Arce më pas premtoi se do të ndiqte ata që ai akuzoi për organizimin e një grushti shteti. Opozita e Bolivisë ka kritikuar mungesën e ndarjes së pushteteve në vend, duke thënë se gjykatat, organi zgjedhor dhe zyra e prokurorit publik janë të gjitha besnike ndaj Arce.
Burimi i lajmit: Aljazeera. Përshtatur nga Tirana Today
