Pas deputetëve të Partisë Demokratike, Majlinda Bregu dhe Eduart Selami, të cilët kanë dalë kundër bojkotit të zgjedhjeve të 18 qershorit nga ana e PD-së, atyre iu bashkohet edhe ish-kryetarja e Kuvendit, Jozefina Topalli.
Bregu dhe Selami e kanë cilësuar si mjaft të dëmshme vendimin e Lulzim Bashës për të mos hyrë në zgjedhjet e 18 qershorit.
Ndërsa deputetja Topalli, e pyetur nga Tirana Today, thekson se ka kërkuar mbledhjen e grupit parlamentar të Partisë Demokratike për të diskutuar rreth zgjedhjeve të 18-qershorit dhe krizës aktuale politike. Por, nuk ka mundur që ta bindë Bashën.
“Prej disa javësh kam kërkuar mbledhjen e grupit parlamentar dhe nuk ia kam arritur”, shprehet Topalli.
Kjo protestë ka ardhur si rezultat i mosmarrjes së një vendimi, lidhur me regjistrimin e PD-së në zgjedhje. Kujtojmë se Selami, Topalli dhe Bregu kanë qenë kundër kryetarit aktual të PD-së, edhe në momente të tjera krizash.
Mirëpo, kësaj here duke parë neglizhencën e Bashës ndaj deputetëve në fjalë, zëra nga PD-ja pohojnë se mos hyrja në zgjedhje është vendim personal i zotit Basha dhe jo vendim i grupit parlamentar.
Kështu që, sipas këtyre zërave, gjatë ditës së nesërme mund të ketë një grupim brenda PD-së, të cilët do të artikulohen sërish lidhur me këtë çështje.
