Tekniku i Kombëtares Shqiptare U-19, Erion Bogdani ka publikuar listën e të grumbulluar për tre ndeshjet e radhës përballë Ukrainës, Norvegjisë dhe Malit të Zi. Duket se ka një numër të lartë lojtarësh që luajnë jashtë territorit Shqiptarë.
“Në datë 4-6-10 nëntor do të kemi tre përballje shumë të forta, përpos rezultateve pozitive që duam te marrim, objektiv kemi edhe nxjerrjen e sa më shumë talenteve për të furnizuar ekipin U-21 dhe pse jo Kombëtaren e madhe. Kemi disa risi në këtë grup nga grumbullimi i fundit, por është ruajtur baza e ekipit. Ka një përfaqësim shumë të ulët nga kampionati Shqiptarë, kjo pasi ka pasur 70 futbollistë që kanë qenë në konkurrencë dhe janë zgjedhur më të mirët”, shprehet Bogdani.
Ka një numër të madh lojtarësh që luajnë në Itali dhe Greqi, bie në sy mungesa e lojtarëve që stërviten në ekipet zviceriane. Që pas asaj deklarate të Federatës së Zvicrës se Shqipëria po na vjedh talentet. Për këtë çështje Bogdani shprehet se: “Para 10-muajsh kam qenë në Zvicër ku është bërë prezantimi i lojtarëve të rinj. Vëzhguam shumë lojtarë përveç atyre të akademisë së Baselit dhe zgjodhëm të përfshijmë këtë grup që publikuam sot pasi na japin garancinë. Por vitin tjetër do të ketë risi të reja dhe dera e FSHF-së është e hapur për të gjithë.”
Ndeshjet do të zhvillohen në stadiumin “Selman Stermasi”. Ish lojtari i kombëtares ka prekur edhe situatën që po kalon Panucci në stolin e Shqipërisë në prag të dy ndeshjeve të radhës që janë përballë ‘big’-ëve, Spanjës e Italisë: “Nuk jam shumë i informuar pasi kam tre ndeshje shumë të rëndësishme përpara. Por me sa kam lexuar tekniku Panucci do të ketë vështirësi pasi janë shumë lojtarë të dëmtuar. Nuk përjashtohet një rezultat pozitiv me Italinë, pasi ndeshja lihet brenda. Ndërsa përballë Spanjës shanset janë të pakta, ata zhvilluan një ndeshje perfekte edhe në duelin me Italinë dhe janë shumë të fortë. U uroj fat çunave në këto përballje të vështira, po ashtu edhe trajnerit Panucci. Jemi në kontakt të vazhdueshëm me U-21 dhe Kombëtaren për të sugjeruar lojtarë, por nuk më pëlqen të përmend emra, u sugjeroj djemve të punojnë fort çdo ditë pasi duke punuar vijnë sukseset.”
