Boateng: Mund të luaja për Realin, por nuk bëra sa duhet

Ish-mesfushori i Milanit, Kevin-Prince Boateng ka treguar se gjatë karrierës së tij ka pasur shansin që të luaj për Realin e Madridit, por nuk ka bërë mjaftueshëm për të qenë atje. Ish-asi i Schalke 04 dhe Hertha Berlin beson se e ka pasur potencialin për të qenë pjesë e klubit më të suksesshëm spanjoll, por i ka humbur vetit mundësitë.

Sezonin që lamë pas Boateng luajti në ligën spanjolle me ekipin e Las Palmas, por në fund të sezonit iu bashkua Bundesligës Gjermane, tek Frankfurti si lojtarë i lirë. 31-vjeçari është shprehur i kënaqur me karrierën e mirë gjatë të cilës ka luajtur në top katër ligat evropiane, përfshirë Premierligën dhe Serie A.

“Sipas mendimit tim, pa dashur të tingëllojë si arrogant, kam mundur të luaja për Real Madridin, por nuk kam bërë mjaft për ta arritur këtë”, ka thënë ish-lojtari i Milanit për Bild. “Megjithatë, kam arritur në një pikë, kur jam i qetë dhe kënaqur me karrierën time”, shtoi ai.