Kreu i LIBRA-s Ben Blushi duke deklaruar votën e tij kundër ndryshimeve në qeveri, theksoi se mazhoranca që po drejton vendin është një bandë e cila ka kapur peng Shqipërinë së bashku me ish-kryeministrin Sali Berisha. Blushi theksoi se kjo qeveri është bashkimi i Çadrës me Rilindjen. Sipas tij, ato përbëjnë një kërcënim real për zgjedhjet e 25 qershorit.
“Hynë të dy në një qeveri Rama dhe Saliu. Nuk ka socialist dhe demokrat që mund ta pranojë këtë. Kjo rrezikon zgjedhjet e 25 qershorit dhe demokracinë shqiptare. Nuk dimë asgjë për ndryshimet në Kodin Zgjedhor dhe çfarëdo propozimesh qofshin, dihet se nuk garantojnë kufizimin e financimit të partive politike, nuk garantojnë numërimin elektronik për të cilin u ngrit edhe çadra. Apo sa i përket transmetimit televiziv përgjatë fushatës elektorale; Kush e paguan dy orë live Edi Ramën? Sot janë bërë bashkë; 6 ministra i ka Rilindja, 5 ministra Çadra, 4 i ka presidenti (Ilir Meta). Kjo është varrosja e presidentit. LIBRA do të përfaqësojë të gjithë ata shqiptarë që nuk e gjejnë veten tek partitë e tjera. Cila është marrëveshja midis Çadrës dhe Rilindjes? Për të garantuar zgjedhjet e lira dhe të ndershme? Kjo është një qeveri e përbashkët. Keni parë ndokund që tre partitë që kanë bandat dhe kanë numëruesit të jenë në një qeveri dhe të kërkojnë vota më 25 qershor. Rilindja dhe Çadra kanë bërë një pakt për të bashkëqeverisur po ashtu edhe presidenti që del dhe bën fushatë”, u shpreh Blushi.
