Kryetarja e Senatit të Holandës, Ankie Broekeres -Knol është shprehur e bindur se Shqipëria do të hapë negociatat Qershorin e vitit 2019, por pasi shteti i saj bashkë me Francën dhe Danimarkën bllokuan hapjen e negociatave të vendit tonë me BE, për këtë vit.
Gjatë një takimi në Tiranë me kryeparlamentarin Gramoz Ruçi, Ankie Broekeres – Knol vlerësoi punën e bërë nga qeveria shqiptare, sidomos sa i përket reformës në drejtësi.
“Shqipëria është një vend evropian, i përket familjes evropiane. Jam e bindur se deri Qershorin e vitit 2019, ju do ti keni përmbushur të gjitha detyrimet tuaja në lidhje me ato që duhet të bëjë Shqipëria për hapjen e negociatave. Jam e impresionuar nga puna që ka bërë Shqipëria deri tani. Do të veçoja gjithë punën e bërë me reformën në drejtësi. Jam e bindur që vitin tjetër në Qershorin e vitit 2019 ju do të hapni procesin e negociatave”,- deklaroi kryetarja e Senatit të Holandës.
Ndërsa vlen të kujtojmë se Holanda është një nga tre shtetet e Bashkimit Evropian, të cilat nuk ishin dakord që Shqipërisë t’i hapeshin negociatat e anëtarësimit këtë vit, duke e shtyrë procesin për në Qershorin e vitit 2019.
