Një ngarkesë e konsiderueshme me birrë është bllokuar nga ana e policisë, pasi kishte hyrë në vendin tonë teksa ishte në prag skadence. Bëhet fjalë për një sasi prej 11.6 ton birrë, e cila është bllokuar në Han të Hotit nga AKU, pasi afati i skadencës së produktit ishte afër datës së deklaruar në etiketë ose në dokomentacionin shoqërues.
“Nga kontrolli fizik i ngarkesës së produktit “birrë”, nga ana e trupës inspektuese në pikën doganore të Hanit të Hotit u konstatua se ky produkt me origjinë nga Estoni – Meksiko, eksportuar nga Mali i Zi, nuk respektonte urdhërin e ministrit Nr.250, dt 29.07.2011, ku ndalohen importet e produkteve në prag skadence”, thuhet në njoftim. AKU ndaloi hyrjen e ngarkesës në sasinë 11.6 ton në territorin e Shqipërisë, dhe kthimin e saj në vendin e origjinës.
Veçanërisht gjatë sezonit turistik, AKU ka shtuar vëmendjen e kontrolleve edhe në pikat kufitare, me fokusin tek subjektet që sjellin produktet e importuara, duke neglizhuar apo shkelur rregullat e sigurisë ushqimore.
