Eduard Sulo, ambasador i Shqipërisë në Kajro, ka dhënë informacione për marinarët shqiptarë në anijen e bllokuar në Libi.
Sipas Sulos, gjendja e marinarëve është e mirë dhe ata po mbahen nën kontrollin e autoriteteve në Libi, ndërkohë që pala shqiptare është në bisedime.
“Marinarët janë kapur nga autoritetet libiane me pretekstin se kanë marrë materiale ndërtime në mënyrë ilegale nga Libia”, tha ambasadori në një prononcim për News 24, duke theksuar se pretendimi i Libisë është se ata kanë transportuar rërë dhe zhavorr.
Ambasadori ka shtuar se anija është ankoruar në një port pranë Tripolit dhe sipas tij, gjendja e marinarëve dhe anijes është e sigurt, ndërsa po veprohet me shpejtësi për lirimin e tyre.
“Po veprojmë me shpejtësi. Edhe ambasada, edhe Ministria e Jashtme shqiptare ka ndërhyrë dhe e ka nën kontroll situatën”, tha Sulo.
