Qeveria duhet fillimisht të formalizojë tregun, pasi ka konkurrencë të pandershme e më tej të diskutohet niveli i taksave, deklaroi kryetari i Dhomës së Tregtisë dhe Industrisë në Tiranë, Nikolin Jaka.
Këtë deklaratë e bëri gjatë Komisionit Parlamentar të Ekonomisë dhe Financave, ku po diskutohej paketa fiskale që do të zbatohet në vitin 2018.
Gjatë këtij komisioni, komuniteti i biznesit i është bashkuar zërit të qeverisë për nevojën e formalizimit të ekonomisë, si hapi më i rëndësishëm për zhvillimin e mëtejshëm, por edhe si hapi që çon në uljen e taksave.
Ndërsa duke folur për taksën e banesave që qeveria propozon që ajo të jetë sa 0.05% e vlerës së saj, nga një taksë fikse që është aktualisht, Jaka tha se para se qeveria të propozojë rritjen e kësaj takse, duhet të vendosë standardet europiane, në kushtet kur ne po synojmë integrimin e vendit.
Në fjalën e tij Jaka propozoi edhe taksë zero për banesën e parë, në mënyrë që individët të stimulohen për të blerë një shtëpi. Ndërsa për shtëpitë e dyta dhe të treta, qytetarët të paguajnë më shumë.
Sipas Jakës, ulja e pragut të përfshirjes në skemën e TVSH-së për bizneset me xhiro deri në 2 milionë lekë do të sjellë evazion fiskal. Ndërkohë Dhoma Amerikane ka ripërsëritur komentet e saj për paketën fiskale, ku anëtarët e saj i kanë kërkuar qeverisë që të mbajë premtimin që bëri përpara zgjedhje, që tatimi mbi pagat e larta mbi 130 mijë lekë në muaj të ulet nga 23% në 18%. Në paketën fiskale aktuale mungon një nismë e tillë.
