Talebanët nuk do të zgjasin afatin e 31 gushtit për misionin aktual të evakuimit, tha një zëdhënës.
31 gushti ishte një vijë e kuqe, tha Suhail Shaheen. Ai u shpreh se Presidenti Biden kishte thënë se trupat do të largoheshin deri në atë datë, dhe zgjatja e afatit nënkuptonte zgjatjen e okupimit të Afganistanit. Ai paralajmëroi për pasojat, nëse kjo do të ndryshonte.
Kryeministri britanik Boris Johnson pritej të përdorte një takim urgjent të G7 të martën, për t’i kërkuar Presidentit Biden të vononte tërheqjen e trupave amerikane, për të lejuar më shumë kohë për evakuime nga aeroporti i Kabulit.
Mijëra afganë dhe shtetas të huaj, po përpiqen të nisen me fluturime jashtë vendit.
Në një intervistë në kanalin “ABC News”, Presidenti Biden tha se Shtetet e Bashkuara do të bëjnë “gjithçka në fuqinë e tyre” për të evakuuar amerikanët dhe aleatët amerikanë nga Afganistani para afatit. I pyetur në mënyrë të përsëritur se si administrata do të ndihmonte amerikanët që do të mbeten në vend pas 31 gushtit, Presidenti Biden tha: “Nëse kanë mbetur qytetarë amerikanë, ne do të qëndrojmë derisa t’i nxjerrim të gjithë”.
Biden i mëshoi fort faktit se ai është i përkushtuar për të mbajtur trupat amerikane në Afganistan, deri sa të evakuohet çdo amerikan, edhe nëse kjo do të kërkonte të mbahej një prani ushtarake atje përtej afatit të 31 gushtit.
Burimi i lajmit: BBC. Përshtatur nga Tirana Today
