Kohë më parë, artistët, analistët, e jo vetëm, hasën në përballjen e fortë e të zëshme nga ana e kreut të Bashkisë, Erion Veliaj, për prishjen e Teatrit. Tentativa e Qeverisë dhe Bashkisë Tiranë për të shembur godinën e Teatrit Kombëtar, përmes një ligji të posaçëm i cili do të kalojë në Kuvend me votat e mazhorancës, hasi në kundërshti të plotë nga një pjesë e artistëve, e ndërsa një pjesë tjetër u bë bashkë me Veliajn.
Por mesa duket, këto ditë pushimi kanë shërbyer për të reflektuar, pasi mazhoranca ka dhënë sot sinjalet e para të tërheqjes. U bë një kohë e gjatë që kjo temë e nxehtë ka nxehur gjakrat e klasës politike, por tashmë mazhoranca ka dhënë sinjalet e para të tërheqjes nga ligji për shembjen e godinës së Teatrit Kombërtar.
Në Konferencën e Kryetarëve të mbajtur ditën e sotme, e thirrur nga kryeparlamentari Gramoz Ruçi, ishte deputeti i PS, Eduart Shalsi, njëherësh edhe kreu i Komisionit të Veprimtarisë Prodhuese, i cili ka propozuar që të shtyhet shqyrtimi i ligjit për Teatrin, pra votimi të mos përcaktohet më 13 shtator siç parashikohet, por në një datë tjetër, ende të papërcaktuar.
Duke qendruar në të njëjtën linjë, kreu i Grupit Parlamentar të PD, Edmond Spaho, ka kërkuar në Konferencën e Kryetarëve që të miratohet menjëherë dekreti i presidentit Meta, i cili ktheu pas ligjin për shembjen e Teatrit. Sipas tij, nëse ata nuk e kanë vullnetin, me këto akte do ta çojnë vendin në krizë.
“Mazhoranca të ketë kurajën që ta sjellë ligjin në Kuvend dhe të miratojë dekretin e presidentit, që është në interes të qytetarëve. Nëse nuk e kanë këtë vullnet, me veprimet e tyre do ta çojnë vendin në një situatë të paqëndrueshme”, u shpreh Spaho, pas përfundimit të Konferencës së Kryetarëve.
