Gjermania humbi betejën e parë në Rusi për të mbrojtur titullin kampion bote përballë Meksikës, pasi u mposht me rezultatin 1-0. Trajneri Joachim Low pas ndeshjes është shprehur i dëshpëruar se tashmë presioni do të bjerë mbi ta dhe do ta bëjë më të vështirë, pasi topi nuk donte të futeshe në rrjetë sot. Gjermania do të përballet me Suedinë dhe më pas me Koren e Jugut në grupin F.
Ai e ka pranuar se kundër Suedisë do të jenë në presion, pasi u duhet patjetër fitorja nëse duan ta kalojnë grupin. “Në pjesën e parë luajtëm shumë keq. Nuk ishim në gjendje të aplikojmë lojën tonë sulmuese apo edhe nuk e qarkulluam mirë topin. Në pjesën e dytë bëmë më shumë presion, por Meksika gjithashtu u zmbraps. Kishim disa gjuajtje në drejtim të portës, por në një apo tjetër mënyrë, dukej sikur topi s’donte të hyjë në portë. Të gjithë jemi të zhgënjyer dhe kokë ulur. Duhet të shikojmë para, e ta lëmë këtë prapa”, tha Low.
Low, që me Gjermaninë triumfoi në vitin 2014 në Brazil, e pranoi se ndeshja me Suedinë është për jetë a vdekje për Kampionët. “Duhet ta fitojmë ndeshjen e radhës, kjo as që diskutohet. Presioni është i gjithi mbi ne kundër Suedisë”, theksoi mes tjerash, Joachim Low.
