Kandidati i Partisë Socialiste për drejtimin e Bashkisë së Kavajës, Klodian Shehi, hedh poshtë zërat për një tërheqje të mundshme të tij nga gara e zgjedhjeve të 7 majit.
Megjithëse përflitet se Partia Socialiste mund ta ndërpresë kandidimin për shkak të protestës masive, që opozita do të mbajë ditën e zgjedhjeve, Shehi thotë se Kavaja nuk do të dorëzohet pavarësisht presionit dhe protestave të Partisë Demokratike.
“Në mënyrë absolute jo. Kavaja nuk dorëzohet kurrë”, shprehet Shehi për “Tirana Today”, kur u pyet nëse ka një kërkesë nga ana e lidershipit të Partisë Socialiste për t’u ndalur.
I pyetur se si do të operojë mazhoranca ditën e zgjedhjeve, kur Partia Demokratike ka paralajmëruar mosbindje civile dhe bllokim të procesit zgjedhor, Shehi vë në dukje se opozita nuk mund të ndalë vullnetin e qytetarëve për të zgjedhur kryetarin e ri të bashkisë së Kavajës.
“Qytetarët janë të lirë të shprehin vullnetin e tyre, për të zgjedhur atë të cilin dëshirojnë të drejtojë bashkinë e Kavajës, këtë vullnet nuk mund ta ndalë askush dhe asgjë”, theksoi kandidati socialist.
Tirana Today
