Një status i publikuar nga ish-kryeministri Berisha, ku pretendohet se janë fshehur dy ngjarje nga Komisariati i Policisë Krujë, është pasuar me një kundërpërgjigje nga uniformat blu.
Me anë të një deklarate zyrtare, policia sqaron se lidhur me ngjarjen, ku është përfshirë në konflikt një oficer policie pranë Komisariatit të Policisë Krujë, janë kryer të gjitha veprimet e duhura ligjore. Po kështu, burime zyrtare shtojnë se publiku është informuar edhe për sasinë e lëndës shpërthyese, vendosur garazhdit të shtetasit me inicialet Sh.Sh.
“Për ngjarjen ku është përfshirë në konflikt një oficer policie, pranë Komisariatit të Policisë Krujë, janë kryer të gjitha veprimet e duhura ligjore.
Konflikti ka ndodhur më datë 23.08.2018, rreth orës 17:00, në rrugën “Kala”, ku për motive të dobëta, të çastit (zënie rruge me mjet, për përparësinë e kalimit) dhe janë konfrontuar fizikisht shtetasit B.T., 66-vjeç, K.T. 31-vjeç (nipi i B.T.) dhe D.T. (mbesa e B.T.) banues në Krujë me shtetasit E.Q. 36-vjeç, punonjës policie dhe A.Q.41-vjeçe, motra e E.Q. Oficeri i policisë nuk ka qenë në detyrë, kur ka ndodhur konflikti.
Në respekt të paanshmërisë së hetimeve, të gjitha veprimet hetimore mbi ngjarjen e mësipërme janë kryer nga oficeri i Policisë Gjyqësore, pranë Prokurorisë së Rrethit Gjyqësor Krujë, nën drejtimin e Prokurorisë, duke filluar procedim penal në gjendje të lirë në ngarkim të shtetasve B.T. dhe K.T. për veprën penale “Plagosja e lehtë me dashje”, në bashkëpunim.
Komunikata nga Oficeri i Policisë Gjyqësore të Prokurorisë është dhënë ditën e sotme dhe do të pasqyrohet në komunikatën zyrtare të Policisë së Shtetit ditën pasardhëse.
Në lidhje me ngjarjen ku në garazhin e shtetasit Sh.Sh., është vendosur një sasi lëndë shpërthyese, informojmë se njoftimi është bërë publik në faqen zyrtare të Policisë së Shtetit, në komunikatën e publikuar sot”.
