Tashmë ka përfunduar procesi i heqjes së dyerve të blinduara në selinë blu. Pjesa hyrëse e fasadës është “zhveshur” nga armaturat metalike, dhe ka marrë pamjen e para 8 janarit. Po kështu është hequr edhe banderola “Zgjedhim të Ardhmen” e vendosur në pjesën qendrore të godinës. Ajo është zëvendësuar me një logo gjigante të Partisë Demokratike.
Dje Komisioni i Rithemelimit të PD-së urdhëroi heqjen e dyerve të blinduara në hyrje dhe në brendësi të godinës së partisë më të madhe opozitare. Punonjësit arritën të heqin dyert e përforcuara me mburojë metalike nga selia blu, si dhe u hoqën veshjet e dyerve me letrat adezive. Të premten, ish-kryeministri Sali Berisha u fut në brendësi të ndërtesës së PD-së pa probleme, pasi Gjykata e Tiranës regjistroi ndryshimet e statutit të PD-së, të miratuara nga Kuvendi i 11 dhjetorit 2021. Ish-lideri historik i demokratëve, i cili ka konfirmuar ambicien për të drejtuar sërish partinë, deklaroi mbrëmjen e së premtes se në mbledhjen e asaj dite të Komisionit të Rithemelimit të PD-së, u morën vendime për riorganizimin e partisë të dytë më të madhe në Shqipëri.
