Ambasadori gjerman në Shqipëri, Peter Zingraf, ka zgjedhur që të mos komentojë lidhur me vendimin e Departamentit Amerikan të Shtetit, që i ndaloi hyrjen në SHBA ish-kryeministrit Sali Berisha dhe familjes së tij. Nga Maliqi i Korçës, Zingraf u pyet nga gazetarët, dhe tha “no comment”.
“Jo, nuk kam komente, jam këtu për të vizituar këtë projekt”, tha Zingraf, duke iu referuar projektit për trajtimin e mbetjeve në Maliq.
Ambasadori gjerman foli për negociatat, dhe u shpreh se qeveria shqiptare i ka plotësuar të gjitha kushtet e vendosura nga Gjermania.
“Le të themi që unë shpresoj që bisedimet e anëtarësimit të nisin sa më shpejt të jetë e mundur. Ky është një proces që kërkon mjaft punë, bashkëpunimin e gjithë aktorëve. Projekte të tilla çojnë në plotësimin e standardeve europiane.
Në emër të qeverisë federale, për të cilën mua më lejohet të flas. Qeveria federale ka thënë që kushtet janë plotësuar tanimë. Të njëjtën gjë konfirmoi dhe BE. Unë jam optimist për nisjen e negociatave. Por ky është një proces që kërkon dakordësinë e të gjitha vendeve. Ministri federal është pro këtyre negociatave”, u shpreh Zingraf.
Sekretari amerikan i Shtetit, njoftoi se SHBA ka futur në ‘listën e zezë’ Sali Berishën dhe familjen e tij. Në argumentimin e DASH thuhej se ky vendim ndaj Berishës vjen pasi është përfshirë në akte korruptive, si keqpërdorimi i fondeve publike dhe ndërhyrje me proceset publike duke përdorur fuqinë për përfitime personale, dhe pasurimin e aleatëve politik përfshi familjen në kurriz të konfidencës publike të qeverisë shqiptare dhe institucioneve.
Shpallja ‘non grata’ e Sali Berishës nga SHBA, ka bërë që ky i fundit të padisë sekretarin amerikan të shtetit, Antony Blinken për ‘shpifje’, me arsyetimin se i ka cënuar rëndë dinjitetin. Berisha tha se padinë do e ngre në Gjykatën Korreksionale në Paris, ndërsa shtoi se zgjodhi Francën si një shtet neutral.
