Ish-kryeministri Sali Berisha ka folur për prapaskenat e vitit 2009, pas zgjedhjeve parlamentare të qershorit, ku PD doli forcë e parë, por ndërkohë ajo nuk siguroi mandatet për të qeverisur vendin pa bërë koalicion. Në një intervistë në Abc News, Berisha u shpreh se nuk ka aspak pendesë për koalicion që ka bërë në atë kohë me LSI-në.
Por pavarësisht kësaj ai deklaroi për herë të parë se nëse LSI nuk do të pranonte koalicionin, ai do ishte i gatshmë t’i kërkonte Ramës që të bashkoheshin në një koalicion për të formuar qeverinë.
“Nëse Ilir Meta nuk do të pranonte në 2009-ën, unë do t’i ofroja bashkëpunim Edi Ramës. Kam deklaruar se nuk shkoj në zgjedhje për kapriço. Se kjo do të thotë se për një mendim të disa liderëve të shkojmë në zgjedhje. Unë nuk mund të bëhem kapriçoz në asnjë rast”-u shpreh Berisha.
Ndërsa kur u pyet lidhur me mundësinë e një koalicioni PS-PD në të ardhmen, Berisha nuk e përjashtoi një diçka të tillë, duke lënë të kuptohet se për interes të sovranit, ish-kryeministri bën gjithçka. Ndërsa shtoi se nëse kjo do të ndodhte, ajo do të ishte një fatkeqësi e madhe.
“I pandryshueshëm mendimi im. Nëse mesazhi sovranit është se vetëm koalicioni do të më qeverisë dhe unë atë do të bëj. Unë do ta quaja një fatkeqësi të madhe, por unë nuk do ta quaja një gjë të pamundur” – tha Berisha.
