Ish-kryeministri, Sali Berisha ka bërë publik denoncimin e një qytetari dixhital, i cili shprehet se drejtori i policisë së Fierit, Andon Marko ka aksidentuar për vdekje një qytetar.
Me anë të një postimi në Facebook, Berisha akuzon ministrin e Brendshëm, Sandër Lleshaj dhe drejtorin e përgjithshëm të policisë, Ardi Veliu se po e fshehin ngjarjen. Në denoncimin e qytetarit të publikuar nga Berisha thuhet se, drejtori i policisë ka qenë i dehur si gjithmonë dhe se e ka goditur shtetasin me makinën e tij të punës.
Por Policia e Shtetit, me anë të një njoftimi zyrtar, e ka mohuar kategorikisht denoncimin e publikuar nga ish-kryeministri.
Postimi i Berishës
Narkokomisari Famoz Andon Marko shtyp për vdekje qytetarin! Gjeneral Kanabisi dhe badiguardi i Eskobarit të Ballkanit, Geron Veliaj fshehin aksidentin tragjik. Lexoni mesazhin e qytetarit dixhital. sb
“Prsh Doktor Berisha, doja t’ju informoja se drejtori i policisë së Fierit Andon Marko pardje në darke në datë 16.07.2019 rreth orës 10 të darkës te kthesa e Vajkanit autostradën Fier-Lushnjë duke qenë i dehur me raki si përditë ka goditur një person me makinën e tij të punës duke e lënë të vdekur në vend dhe Policia e ka mbajtur të fshehur ngjarjen dhe s’ka dalë as në media. Ne për një birrë na fusin në burg kurse vet këta vrasin njerëz në rrugë dhe s’u hyn gjemb në këmbë. Ju lutem anonim se nga këta çfarë nuk pret”.
Informacioni zyrtar i policisë:
Sot rreth orës 21:35, në aksin rrugor Lushnje-Fier, në vendin e quajtur “Vajkan” një mjet i paidentifikuar ka goditur shtetasin SH.I., 63 vjeç, banues në Fier, i cili po udhëtonte me biçikletë. Drejtuesi i mjetit pas aksidentit është larguar nga vendngjarja. Grupi hetimor po punon për identifikimin e mjetit dhe zbardhjen e plotë të ngjarjes.
