Eleni Foureira ka qenë një nga personazhet më të diskutuara ditët e fundit si në mediat shqiptare dhe në ato greke. Këngëtarja me origjinë shqiptare, e cila u bë e famshme në Greqi, këtë vit përfaqëson Qipron në Eurovizion.
Por një foto e saj ku shfaqet së bashku me Eugent Bushpepaj ku po bënin shqiponjën me duar, ka ngjallur jo pak polemika në shtetin fqinjë. Ajo prej ditësh është kryqëzuar nga mediat greke, të cilat veprimin e saj e cilësojnë si një provokim dhe madje se ajo përkrah idenë e ‘Shqipërisë së madhe’.
Edhe pse vetë këngëtarja reagoi ditën e djeshme nëpërmjet një postimi ku sqaroi se nuk ka lidhje fare me çështjet nacionaliste që aludojnë mediat, mesa duket populli grek nuk ka të ndalur dhe e ka kthyer gjestin e Elenit në një debat kombëtar.
Së fundmi në këtë debat është përfshirë dhe një nga politikanet e njohura në Greqi, Rakil Makri, e cila e ka sulmuar keq këngëtaren shqiptare duke i përmendur se me lekët e grekëve ajo është bërë e famshme dhe s’duhet të guxonte të bënte shqiponjën me duar.
Më pas ajo e ironizon duke e thirrur ‘Meksikane’ pasi në fillimet e veta këngëtarja e mohoi origjinën e saj dhe tha se është nga Meksika, dhe ju drejtua asaj duke i thënë se duhet ta dërgojnë në Shqipëri që ta bëj shqiponjën me duar sa herë të dojë, pasi në Greqi duhet të respektojë historinë e vendit.
“Meksikania” që deri dje ndiente turp të thoshte se ishte nga Shqipëria tani dëshiron një Shqipëri të madhe dhe as nuk pyet e as nuk kërkon falje. Ajo po luan me inteligjencën e grekëve.”, ka shkruar në postimin e saj politikania.
