Teksa Bregu, Topalli dhe Selami dënuan bojkotimin e zgjedhjeve, duket se ka pasur edhe nga ata deputetë që i kanë shkuar në fund mendimit se nuk duhet të bëhet kompromis me mazhorancën.
Në mbledhjen e djeshme të grupit parlamentar, mësohet se Gent Strazimiri dhe Gert Bogdani kanë këmbëngulur për rezistencë dhe bojkot të zgjedhjeve, nëse nuk ka qeveri teknike.
“Unë nuk shoh asnjë vend për negociata. Nuk kemi ç’të negociojmë me Ramën. Ai është i njëjtë gjithmonë, i njëjtë si ai që kemi parë në Korçë, në Dibër dhe siç do të shohim në çdo zgjedhje që ai do të ketë mundësi t’i drejtojë”, ka thënë Strazimiri.
Po ashtu, deputeti demokrat, Gert Bogdani, thotë se njerëzit duan që PD-ja të mos tërhiqet: “Tani më ka ardhur një mesazh nga një prej njerëzve që janë në çadër dhe më thotë se PD-ja nuk duhet të tërhiqet, pasi nëse tërhiqet populli do të jetë ai që humb, ndërkohë që deputetët e PD-së do të dalin me vetëm 50 mandatet e tyre”.
Pavarësisht këtyre qëndrimeve, Basha pranoi ftesën e presidentit Nishani për të negociuar me kryeministrin Rama.
