Belgjika ka publikuar listën e 28 lojtarëve të cilët janë përzgjedhur nga trajneri Roberto Martinez, ku bie në sy një mungesë e madhe e mesfushorit të Romës, Radja Nainggolan. 30-vjeçari është një ndër lojtarët kryesorë të Romës dhe me kombëtaren ka dhënë maksimumin, por nuk ka mjaftuar për të bindur drejtuesit.
Martinez është këmbëngulës, vendimi për të është thjesht taktik dhe shpresat e Nainggolan për të përfaqësuar vendin e tij në Rusi marrin fund. Në fakt, shpresat e tij u rritën disi, kur u ftua për miqësorët kundër Meksikës dhe Japonisë, në nëntor, dhe ndaj Arabisë Saudite, në mars.
“Para së gjithash, të gjithë e dimë që Radja është një lojtar i nivelit të lartë, nuk ka dyshim në lidhje me këtë, – tha trajneri i Belgjikës në një konferencë shtypi. – Kjo zgjedhje është vetëm për arsye taktike. Gjatë dy viteve të fundit, ekipi ka punuar në një mënyrë sulmuese, në një mënyrë shumë specifike.
Në rastin e Radja, ne të gjithë e dimë se ka një rol shumë të rëndësishëm në nivelin e klubit, por nuk mendoj se mund t’ia japim këtë rol edhe në ekipin kombëtar. Kam udhëtuar dje për ta parë atë me Romën dhe kemi pasur një bisedë shumë të mirë. Vendimi nuk është i lehtë, e kuptoj se sa popullor është lojtari, por ne duhet të krijojmë ekipin sa më fitues të mundshëm. Është thjesht një vendim taktik”.
Trajneri Martinez ka emëruar një skuadër të përkohshme me 28 lojtarë për turneun, çka do të thotë se ka vend për momentin edhe për Christian Benteke dhe Nacer Chadli, pavarësisht sezoneve zhgënjyese në Premier League, me Crystal Palace dhe West Brom, respektivisht. Michy Batshuayi është përfshirë, gjithashtu, pavarësisht se vuan një dëmtim të pësuar në fund të sezonit, gjatë ndeshjes për Borussia Dortmund, në prill. Belgjika futet në Botërorin e Rusisë si një nga favoritët.
Ja lista me 28 lojtarë e Belgjikës, që do të reduktohet në 23 emra, përfundimisht:
Portierë: Koen Casteels (Wolfsburg), Thibaut Courtois (Chelsea), Simon Mignolet (Liverpool), Matz Sels (Newcastle)
Mbrojtës: Toby Alderweireld (Tottenham), Dedryck Boyata (Celtic), Laurent Ciman (Los Angeles FC), Christian Kabasele (Watford), Vincent Kompany (Manchester City), Jordan Lukaku (Lazio), Thomas Meunier (Paris Saint-Germain), Thomas Vermaelen (Barcelona), Jan Vertonghen (Tottenham);
Mesfushorë: Nacer Chadli (West Brom), Kevin De Bruyne (Manchester City), Mousa Dembele (Tottenham), Leander Dendoncker (Anderlecht), Marouane Fellaini (Manchester United), Youri Tielemans (Monaco), Axel Witsel (Tianjin Quanjian);
Sulmues: Michy Batshuayi (Chelsea), Christian Benteke (Crystal Palace), Yannick Carrasco (Dalian Yifang), Eden Hazard (Chelsea), Thorgan Hazard (Borussia Monchengladbach), Adnan Januzaj (Real Sociedad), Romelu Lukaku (Manchester United), Dries Mertens (Napoli).
