Zëvendës-ministri i Brendshëm, Besfort Lamallari shprehet se autoritetet shqiptare kanë kërkuar që në prill nga Belgjika vendimin e dhënë nga drejtësia atje për Safet Bajrin, në mënyrë që të kryhej arrestimi, por procedurat kanë vonuar 5 muaj. 
“Autoritetet shqiptare kanë kërkuar disa herë që nga prilli 2018 për vendimin e gjykatës kundër Safet Bajrit (Rustemi)”, citohet Besfort Lamallari nga mediat belge.
Nëse vendimi nga Belgjika vinte më shpejt, kjo sipas Lamallarit, do të kishte sjellë arrestimin më herët të Safet Bajrit (Rustemit), për llogari të autoriteteve belge.
“Në Shqipëri, ekzaktësisht në Shkodër kanë ndodhur disa ngjarje kriminale përfshi edhe vrasje. Grupi “Bajri” është hetuar për disa ngjarje të tilla dhe kjo mund të ishte shmangur (referohet ngjarjeve kriminale në Shkodër). Që nga Prilli i vitit 2018 autoritetet shqiptare kanë kërkuar vazhdimisht nga autoritetet belge vendimin e Gjykatës për Safet Bajrin. Ministria e Brendshme, Policia Shqiptare, zyra e Prokurorit përmes kanaleve të komunikimit kanë ngulmuar që autoritetet belgë të përshpejtojnë procesin për dërgimin e dosjes për Safet Bajrin, por kjo dosje ka mbërritur në Shtator”.
Ndërsa të tjera detaje bën të ditur media belge se zëvendës-ministri i Brendshëm, Besfort Lamallari flet për “pengim”. “Sikur të ishte dërguar 4 muaj më parë dosja e tij dhe masa e dënimit, katër vrasje do të ishin parandaluar”.
Ndërkohë, Ministri i Drejtësisë në Belgjikë Koen Geens, citohet nga mediat belge të thotë se do të donte që dosja të transferohej më herët në Shqipëri, por shton që kemi të bëjmë me një gabim njerëzor. Megjithatë, sipas tij, vonesa në arrestimin në Shqipëri nuk është për shkak të palës belge.
“Nëse dikush ka fakte në vitin 2001 dhe të njëjtat fakte i ka sërish në dhjetorin e vitit 2017, është e çuditshme, por vonesa në arrestim nuk është për shkak të belgëve. Diçka shkoi keq në procedurat për dënimin e tij. Shërbimet tona mund të kishin punuar më mirë. Nëse Belgjika dhe departamenti i Emigracionit nuk do e kishte dëbuar Rustemin, nuk e di nëse këto fakte do të kishin dalë në dritë në Shqipëri. Bashkëpunimi mes dy agjencive ka qenë shumë i mirë”, tha Geens në një emision televiziv në Belgjikë.
Tashmë dënimit me 22 vite burgim i dhënë ndaj Bajrit në Belgjikë, i është hapur rruga e konvertimin në vendin tonë. “Ekstradimi i Bajrit në Belgjikë është i pamundur, pasi dy vendet nuk kanë një marrëveshje. Por, Shqipëria dhe Belgjika kanë nënshkruar një marrëveshje për njohjen e dënimeve”, ka konfirmua ministri belg. /TIRANA TODAY/
