Na ndajnë vetëm pak ditë nga starti i Ligës së Kombeve, një kompeticion ndërkombëtar që do të zhvillohet për herë të parë. Më 7 shtator Shqipëria do të presë në “Elbasan Arena” Izraelin. Të dy kundërshtarët njihen mjaft mirë pasi nuk ka kaluar shumë nga përballja e fundit.
Trajneri i Izraelit, Andreas Herzog, në një intervistë ka komentuar situatën në ekipin që ai drejton, por gjithashtu ka folur edhe për kundërshtarin e radhës që është Shqipëria. Ai shprehet se është mirë që e nisin ndaj kuqezinjve, pasi e njeh mjaft mirë mentalitetin e tyre.
“Liga e Kombeve fillon tani. Ky turne është diçka e re për çdo ekip, nuk ka lojëra miqësore. Ne do ta nisim kundër Shqipërisë, kjo është një mundësi e mirë që ne të lëvizim nga Grupi C në B.
Gjithashtu kjo është një tjetër mundësi e shkëlqyer për t`u kualifikuar për Euro 2020. Ne duam të kualifikohemi në “play-off”, finalja do të jetë në vitin 2020. Por ne duhet të përqendrohemi në ndeshjen e ardhshme në Shqipëri.
Shumica e lojtarëve janë grumbulluar. E rëndësishme është ta nisim me këmbën e djathtë turneun. Ne duhet të gjejmë ekuilibrin e duhur gjatë trajnimit sepse është fillimi i sezonit dhe jo të gjithë futbollistët janë njësoj. Këto janë të gjitha ndeshje finale ku duhet të jepet çdo gjë.
Unë urrej të humbas dhe më pas ta kaloj përgjegjësinë te lojtarët e mi. Ne duhet të kemi mentalitet fituesi, si mentaliteti im. Shqipëria është një ekip që ka bërë përparim të madh. Ata u kualifikuan në Euro 2016. E njoh mentalitetin e tyre luftarak dhe teknik”, ka thënë Andreas Herzog.
