Këngëtarja me famë botërore Bebe Rexha, në një intervistë për Marie Claire UK ka rrëfyer se fama dhe karriera në muzikë i ka shkaktuar probleme në shëndetin mendor.
Suksesi i saj i jashtëzakonshëm bëri jehonë ndërkombëtare. Në këtë intervistë Rexha ka folur si rrallëherë për jetën dhe problemet e saj. Industria e muzikës ka edhe anët e errëta, të cilave nuk i ka shpëtuar as këngëtarja me origjinë shqiptare.
“Kisha momente kur s’doja të dilja nga shtëpia. Qëndroja në një qoshe dhe tmerrohesha. Nuk e dija se çfarë ishte ankthi. Vetëm kur shkova tek terapisti, mësova mënyrën se si ta kontrolloja. Nisa të shkoja në terapi në fillim të 20-ve”, tha këngëtarja.
“Ushtrimet fizike, ushqyerja në mënyrë të shëndetshme dhe ndryshimi i prioriteteve ndikuan në përmirësimin e shëndetit tim mendor”. Kam pasur momente në të cilat ndihesha e pashpresë, shprehet Rexha. Ishin momentet kur shtëpia e parë diskografike nuk pranonte të publikonte këngët e saj, dhe nuk e linte të largohej.
