Bashkimi Evropian njoftoi të enjten se ka ndarë 33 milionë euro për të financuar ndihmën emergjente fillestare për Libanin.
Presidentja e Komisionit Evropian, Ursula von der Leyen, foli në telefon me kryeministrin Libanez Hassan Diab për ta njoftuar për ndihmën e Bashkimit Evropian.
Në një letër drejtuar 27 vendeve anëtare të BE-së, von der Leyen dhe Charles Michel, President i Këshillit Evropian, iu bëjnë thirrje “të kontribuojnë në rimëkëmbjen e Libanit”:
“Ne ju ftojmë të intensifikoni mbështetjen tuaj për Libanin, si për nevojat e menjëhershme, por edhe me qëllim të rindërtimit afatgjatë të vendit”.
Rikujtojmë se më 4 gusht, një shpërthim në një depo me kimikate në Bejrut la të vdekur mbi 130 persona si dhe plagosi mijëra të tjerë.
Hetimet e para thonë se materiali ishte ruajtur në mënyrë të pasigurtë në depo. Dëmet materiale konsiderohet të arrijnë vlera miliardëshe, shkruan “Rel”.
