Vendosja e taksës nga shteti i Kosovës për produktet serbe ka shkaktuar reagime të shumta teksa ka thelluar krizën mes këtyre dy shteteve. Bashkimi Evropian ka kërkuar që autoritetet kosovare të ndërmarrin hapa drejt vazhdimit të dialogut për normalizim të marrëdhënieve me Serbinë.
Kështu deklaruan për Radion Evropa e Lirë zyrtarët në Bruksel, pas paralajmërimit të presidentit serb, Aleksandër Vuçiç, se nuk do të takohet me homologun kosovar, Hashim Thaçi, derisa të jetë në fuqi taksa që u ka vënë Kosova importeve nga Serbia dhe Bosnje e Hercegovina.
Mësohet se kjo ka qenë edhe tema kryesore e takimit të dy presidentëve në Bruksel, me ndërmjetësimin e shefes së politikës së jashtme të BE-së, Federica Mogherini.
Zëdhënësja e Mogherinit, Maja Kocijançiç, tha se masa që ka ndërmarrë Kosova ndaj prodhimeve të Serbisë dhe Bosnjës minon bashkëpunimin rajonal dhe “nuk është në përputhje me parimet e Marrëveshjes së Stabilizim-Asociimit”.
“E kemi bërë të qartë se vendimi i Qeverisë së Kosovës është shkelje e detyrimeve të Kosovës që dalin nga CEFTA (Marrëveshja për Tregti të Lirë midis vendeve të Evropës Qendrore). Ne qartë presim që Kosova ta tërheqë këtë masë”, tha ajo.
Të martën, Qeveria e Kosovës ka marrë vendim për vendosjen e taksës doganore mbi mallrat e importuara nga Serbia dhe Bosnja e Hercegovina.
Kjo masë nënkupton taksën prej 10% në të gjitha importet me prejardhje nga Serbia dhe Bosnja.
