Elseid Hysaj padyshim është duke kaluar një formë mjaft të mirë dhe është vënë në shënjestër të ekipeve të mëdha europiane. Interes për të ka shfaqur edhe gjiganti i Batyer Munich, të cilët nuk e kanë problem edhe të paguajnë klauzolën e tij, prej 50 milionë eurosh. Disa emisarë të bavarezëve pritet të jenë në “Allianz Stadium”, në përballjen mes Napolit dhe Juventusit. Lajmin e bën të ditur “Tuttomercatoweb” në Itali.
Drejtuesit e Bayernit janë në kërkim të zëvendësuesit të Rafinas, i cili duket se do ta lërë këtë ekip pas shumë vitesh. Dhe i përzgjedhuri është Hysaj, që do të vëzhgohet nga afër në ndeshjen ndaj Juventusit.
Për lojtarin e Kombëtares kuqezi është interesuar në janar edhe Arsenali, por në këtë moment Bayerni po lëviz konkretisht dhe nëse Hysaj bind me paraqitjen e tij ndaj Juves, marrëveshja me klubin e madh gjerman do të jetë edhe më pranë.
E ardhmja e shkodranit duket larg Napolit, në një klub më të madh evropian dhe me shumë gjasa në Gjermani. Kalimi i tij te Bayerni do të lumturonte shumë shqiptarë, pasi dihet që Bayerni ka shumë tifozë në Shqipëri.
