Bashkëshortja e presidentit ukrainas, Olena Zelenska ka rezultuar së fundmi pozitive me koronavirus.
Lajmin e bëri të ditur vetë Olena, përmes një postimi në rrjetet sociale. Ajo shprehet se ky lajm e kishte zënë në befasi pasi është munduar të respektojë rregullat.
“Sot, unë pranova rezultatin pozitiv të testit për koronavirus. Lajm i papritur, sidomos duke konsideruar se familja ime dhe unë kemi zbatuar të gjitha rregullat”, tha ajo.
Kjo ka bërë që presidenti Volodomyr Zelensky të njoftojë se do të shkëputet nga takimet dhe udhëtimet për një periudhë.
Zyra e presidentit njoftoi se ai do të anulojë të gjitha takimet, udhëtimet dhe ngjarjet e tjera, si dhe do të evitojë kontaktin me ekipin e tij të afërt.
Zelenskiy ka rezultuar negativ ndaj testit për koronavirus dhe tani do të vazhdojë testimin ditor dhe kontrollet tjera mjekësore.
Deri më tani, Ukraina ka regjistruar rreth 30 mijë raste infektimi dhe 870 viktima.
