Tensionohen marrëdhëniet mes Moskës dhe Varshavës, pas akuzave të njëpasnjëshme lidhur me fajin për fillimin e Luftës së Dytë Botërore.
Presidenti rus, Vladimir Putin ka hedhur akuza ndaj Polonisë për bashkëpunim të fshehtë me Adolf Hitler dhe qarqet anti-semite gjatë Luftës së Dytë Botërore. Ndërsa Polonia e akuzoi Rusinë se i është kthyer propagandës staliniste dhe po dëmton përpjekjet për përmirësimin e marrëdhënieve.
“Në thelb, ata kanë bashkëpunuar me Hitlerin. Kjo është e qartë në bazë të dokumenteve të arkivit”, tha kreu i Federatës Ruse. Ndërsa shtoi se një ambasador polak i asaj periudhe kishte premtuar se do ta vendoste statujën e Hitlerit në Varshavë për shkak të zotimeve të tij për t’i dërguar çifutët në Afrikë.
“Pak gjëra kanë ndryshuar dhe duhet ta marrim parasysh këtë, kur i ndërtojmë forcat tona të armatosura”, shtoi Putini.
