Kryetari i Partisë Demokratike është mbyllur në selinë blu prej orës 08:00 të mëngjesit dhe po ndjek procesin e votimit. Deri tani ai nuk ka bërë asnjë deklaratë publike, por për atë u fol vetëm në deklaratën e Besnik Mustafajt i cili ka treguar në studion e “News 24” se ai ka marrë menjëherë një telefonatë nga kreu i Partisë Demokratike, Basha i cili i ka kërkuar Mustafajt që të jetë i kujdesshëm me deklaratat e tij, në mënyrë që të mos dekurajohen numëruesit demokratë.
Basha deri tani nuk ka bërë asnjë deklaratë publike, duket se është “ngujuar” në “fortesë” me shpresën se do të vijë ndonjë “Maratonomak” dhe do t’i jap lajmin e shumëpritur të fitores së PD-së. Me sa duket këtë herë nuk do të vijë askush t’i jap lajm të mirë Bashës, të gjitha të dhënat nga qendrat e votimit japin një humbje të thellë për Parinë Demokratike.
Menjëherë pas rezultateve të para disa figura të PD-së kanë kërkuar dorëheqjen e menjëhershme të Lulzim Bashës si kryetar i Partisë Demokratike. Disa nga zërat kritikë në PD-së kanë thënë se presin të përfundojë procesi i numërimit. Ata e kanë cilësuar rezultatin paraprak të PD-së, katastrofal. Disa kanë bërë ironi edhe me ekipin fitues të zotit Basha. Disa prej tyre nuk kanë nguruar ta krahasojnë këtë humbje me atë që mori Partia Socialiste në zgjedhjet e vitit 1991.
Me sa duket në vend të “maratonomakut” në selinë blu do të futet një lajmëtar që do t’i kërkojë zyrtarisht dorëhëqjen Bashës.
Zgjedhjet për kryetarin e Parisë Demokratike pritet të mbahen në 22 korrik, këtë gjë e kishte lajmëruar dhe vetë Basha gjatë fushatës.
