Kryetari i Partisë Demokratike ka zgjedhur që të urojë sot Pashkët për të gjithë besimtarët e krishterë nga Kisha e Shna Ndout, në Laç.
Nëpërmjet një videoje selfie, lideri i së djathtës lutet për të gjithë shqiptarët në nevojë:
“Sapo kam mbërritur në një nga vendet më të shenjta për shqiptarët, për besimtarët e krishterë dhe të gjithë shqiptarët, në Kishën e Shna Ndout në Laç, dhe dua prej këtej t’u uroj gjithë shqiptarëve gëzuar për shumë vjet Pashkët. Kjo ditë e ngjalljes së Krishtit, për të cilën sot nga Kisha e Shna Ndout lutem për të gjithë bashkëqytetarët e mi, në veçanti për ata më në nevojë, për të vobektit, për të sëmurët dhe familjarët e tyre.”
Më tej, Basha lutet edhe për Shqipërinë, teksa shprehet:
“Lutem që kjo ditë e ngjalljes së Krishtit, të jetë dita e ngjalljes së shpresës dhe besimit tek paqja dhe e nesërmja e sigurtë nën drejtimin e Zotit fuqiplotë, që të na e ndriçojë rrugën e bashkimit kundër padrejtësive, për ta çliruar Shqipërinë nga padrejtësitë, për t’u bashkuar të gjithë si vëllezër dhe si motra nën Perëndinë në këtë ditë të ngjalljes së Krishtit, për një Shqipëri të së ardhmes më të mirë për çdo familje. Zoti e bekoftë Shqipërinë.”
