Kreu i Partisë Demokratike i ka dhënë një ultimatum kryeministrit Rama nga qyteti i Durrësit, ku zhvilloi një takim me qytetarët.
Teksa i ftoi këta të fundit për të marrë pjesë në protestën e 16 shkurtit, Basha i kërkoi Ramës që të largohej deri më 15 shkurt, përndryshe do “e shkulin nga karrigia e pushtetit’.
Po ashtu, deputeti demokrat i bëri thirrje Prokurorisë të arrestojë kreun e Bashkisë së Durrësit brenda datës 15 shkurt, përndryshe do ia vendosin prangat qytetarët.
“Të bashkohemi të gjithë në protestën e 16 shkurtit. Institucionet e vendit nuk ju shërbejnë më juve, por vetëm një grusht oligarkëve, pasi kjo qeveri nuk ka ardhur nga votat tuaja. Koha e fjalëve ka mbaruar. Durrësi mezi po pret. Edi Rama, largoji deri në datën 15 shkurt sepse në datën 16 populli do të të shkulë nga karrigia! Prokuroria shqiptare, arresto Vangjush Dakon, pasi në të kundërt në datën 16 prangat do t’ia vënë qytetarët. Koha për fjalët ka mbaruar vëllezër e motra prandaj merrni fatin e vendit në duart tuaja”, tha Basha.
