Kryetari i Partisë Demokratike, Lulzim Basha vijon akuzat në drejtim të kryeministrit, Edi Rama në lidhje me menaxhimin e pandemisë Covid-19 në vend.
Sipas Bashës, Rama e ka humbur kontrollin mbi pandeminë pasi nuk ka asnjë plan dhe masë reale.
Kryeopozitari shprehet se braktisja e 75 mijë diabetikëve, të cilët janë ndër më të rrezikuarit, është dëshmi tjetër e daljes së situatës nga kontrolli.
Basha thotë se nëse Rama do zbatonte planin me 5 pika, situata nuk do ishte e tillë.
Postimi i Bashës në rrjetin social, Facebook
Edi Rama e ka humbur kontrollin mbi pandeminë. Asnjë plan, asnjë masë reale. Braktisja e plotë e mbi 75 mijë diabetikëve, ndër më të rrezikuarit nga COVID-19, është dëshmi tjetër e daljes së situatës nga kontrolli.
Përfaqësuesit e Shoqatës së Diabetikëve konfirmuan shqetësimet e thella që kemi ngritur prej javësh. Sistemi shëndetësor është në kolaps. Spitalet janë jashtë funksionit.
Nëse Rama do të zbatonte planin tonë me 5 pika, nuk do të ishim sot këtu. Edhe sa familje shqiptare duhet të humbin të dashurit e tyre, që kryeministri të bëjë detyrën?
Së bashku do ta mposhtim të keqen, do të ndihmojmë familjet shqiptare dhe ekonominë e do të sjellin një shpresë të re për vendin
