Kreu i Partisë Demokratike, Lulzim Basha ka akuzuar kryeministrin Rama se ka instaluar një shtet privat.
Basha akuzoi në mënyrë të drejtpërdrejtë edhe Prokuroren e Përgjithshme të përkohshme, Arta Markun se ka mbrojtur lidhjet e qeverisë më krimin dhe se ka shkatërruar Prokurorinë e Krimeve të Rënda.
Sipas kryedemokratit, shteti privat i Ramës fabrikoi dëshmitarë për mbrojtjen e Rrahman e Rexhep Rrajës, si dhe për të shpëtuar Agron e Fatmir Xhafajn.
Fjala e Bashës:
Shqipërisë i është instaluar një shtet privat i Ramës, që funksionon jashtë Kushtetutës. Dje, Rama e pranoi ekzistencën e shtetit privat kur deklaroi se ka një strukturë të posaçme hetimore që i shërben atij personalisht. Deputetë, drejtorë të policisë dhe prokurorë që fabrikojnë prova e dëshmitarë për të shpëtuar kriminelët. Drejtues të këtj inskenimi janë edhe Fatmir Xhafaj e Arta Marku. Shteti privat i Ramës vendosi të fabrikojë dëshmitarë për të sulmuar gazetarët e denoncuesit për të shpëtuar trafikantin Agron Xhafajn dhe mbrojtësin e tij, Fatmir Xhafajn. I njëjti shtet privat që ka fabrikuar gjithçka për mbrojtjen e Rexhep e Rrahman Rrajën. Bënë gjithçka me dhunë e para për të shpërfytyruar viktimën e dhunës. Pushteti sulmon gazetarët, denoncuesit e kundërshtarët politikë për të mbrojtur kriminelët. Jemi në kushtet e një diktature mafioze. Me Fatmir Xhafajn s’do ketë kurrë luftë kundër krimit. Xhafajt triumfuan mbi Habilajt e Tahirin, sot shteti është në mbrojtje të familjes Xhafaj. Arta Marku u soll politikisht për të mbrojtur lidhjet e qeverisë me krimin. Marku ka shkatërruar prokurorinë e krimeve të Rënda. Marku s’ka nisur hetimet për lidhjet kriminale të politikanit bandit, Taulant Balla.
