Kryetari i Partisë Demokratike, Lulzim Basha tha pas seancës plenare se kryeministri Rama është tipik si diktatori Enver Hoxha. Në një prononcim të shkutër për mediat, Basha, vuri në dukje se shqiptarët nuk i besojnë më pasi ai ka rrënuar vendin deri më tani dhe nuk ka mbajtur asnjë përgjegjësi.
“Kjo ishte paraqitja më boshe. Ishte e gjitha një demagogji dhe propagandë. Ishte një reminishencë e kohës së kaluar, kur Byroja Politike mbante fjalime në këtë sallë. Asnjë shqiptar nuk ka pritshmëri nga Edi Rama. Ky njeri refuzoi të kërkojë ndjesë për mosrealizmin e hapjes së vendeve të reja të punës. Ky është një turp i madh. Ai i ka larguar shqiptarët. Shqiptarët nuk lëvizin lirisht si të tjerët, por në kushte çnjerëzore. Ky është realiteti i hidhur i një ekonomie të rrënuar. Prej 3 javësh prindërit dhe fëmijët janë rraskapitur për të marrë librat e fëmijëve të tyre. “Rama 2” nuk e njeh “Rama 1”. Por, janë të njëjtët. Është i njëjti person. “Rama 2” refuzon të mbajë përgjegjësi për “Rama 1.” Përgjegjësia e tij nuk është që të përcaktojë historinë dhe të merret me Skënderbeun se ka kush merret me të. Por të japë përgjigje se kush e shkatërroi ekonominë shqiptare. Rama është i rrezikshëm. Ai është në aleancën me krimin. Kjo është një shfaqje e shëmtuar. Të vetmit që përfaqësojnë vullnetin e qytetarëve janë deputetët e PD-së. Ne jemi sot dhe do të jemi çdo ditë aty për të ndalur atë. Që nesër do të kumbojë zëri i së vërtetës dhe zëri i opozitës”, theksoi Basha.
