Kryetari i Partisë Demokratike Lulzim Basha ka përsëritur thirrjen ndaj qytetarëve që të refuzojnë dhe të mos paguajnë taksat e rritura, ndërsa biznesi i vogël mos të paguajë TVSH-në që hyri në fuqi prej datës 1 Prill.
Në një deklaratë për mediat nga selia blu, Basha theksoi se të gjithë duhet të refuzojnë pagesat e taksave të shtuara dhe të mos frikësohen, pasi nuk mund të arrestohet i gjithë populli.
“Ata që u çuan janë ndër njerëzit më të varfër të Shiqprisë ndër vite. Ata u çuan për bukën e gojës. Kjo është arsyeja e revoltës së këtyre njerëzve të thjeshtë. Të gjithë shqiptarët janë subjekt i grabitjes së dyfishtë të Edi Ramës.
Kriminelët, ata që bëjnë drogën bredhin të lirë, ndërsa njerëzit që çohen dhe protestojnë kundër grabitjes dhe padrejtësisë, arrestohen.
Mosbindje qytetare do të thotë refuzim i padrejtësië. Do të thotë mos paguajnë taksat e rritura. Është thirrje ndaj biznesit të vogël mos paguajnë TVSH-në. Mos paguani taksa, nuk ka çfarë t’ju bëjë. Nuk e arreston dot popullin. Në këtë rrugë dhe çdo veprim që qytetarët do ndërmarrin, opozita do jetë në krahun e tyre”, u shpreh Lulzim Basha.
