Kreu i PD-së, Lulzim Basha ka folur sot në Çadrën e Lirisë, teksa është shprehur me vendosmëri se nuk do ketë asnjë dialog, nëse nuk ka qeveri teknike, si dhe shtoi se PD-ja ka nisur të marrë përgjegjësitë për qeverisjen e Republikës së Re.
Basha tha se Rama nuk e do Vettingun, por i trembet atij “si vampiri diellit”, ndërsa Shqipërinë po e përdor si plaçkë që ta grabisë me koncesione e me leje ndërtimi.
Më poshtë fjala e Bashës:
Edi Ramës nuk i bëhet vonë për asgjë tjetër, përveç xhepave të tij. Rama e di që është kryeministër në largim, ka nisur të sillet që tani si opozitë e papërgjegjshme, ne po nisim që sot të marrim përgjegjësitë për Republikën e Re.
Sot është provuar se reformat që Rama i ka në majë të gjuhës nuk janë gjë tjetër veç teatrit të luajtur që 4 vite. Rama do një Shqipëri plaçkë dhe çiflig që mund ta grabisë me leje ndërtimi, me koncesione e me drogë. Sot më shumë se në çdo ditë tjetër, ta dini se edhe më skeptikët ndaj kësaj çadre, e kuptojnë se ajo që ne kemi thënë prej ditës së parë është e vërteta dhe e drejta. Se Rama zgjedhjet i do për fasadë, opozitën për alibi për të nxjerrë në treg gjithçka që ky shtet ka, gjithçka përveç karriges së tij.
Sot shpaloset fare e qartë, para çdo shqiptari se Edi Rama përfaqëson kërcënimin më real ndaj shpresave të çdo shqiptari të majtë e të djathtë.
Dita e sotme konfirmon se këta konsiderojnë gjithçka plaçkë të tyre, këtu është katandisur demokracia fasadë me kupolën e Edi Ramës dhe Ilir Metës.
Edi Rama ka dështuar me ekonominë, Edi Rama ka dështuar me arsimin, Edi Rama ka dështuar të zbatojë ligjin për dekriminalizim, Edi Rama sot ka firmosur edhe dështimin e tij total që e përdori si alibi për dështimin e tij të madh kombëtar.
Sot në këtë ditë të 70-të, është rasti t’i përsërisim që tani se dështimi i tij me ekonominë, me arsimin, me rendin, me drejtësinë, e me dekriminalizim është shpalosur ashiqare tani që ka vendosur karrigen e tij midis një populli që kërkon zgjedhje të lira e të ndershme. Rruga e vetme e shpëtimit për të është qeveria teknike si garante e zgjedhjeve të lira e të ndershme, duke luftuar drogën, dhe që orën e parë të qeverisë teknike, Vettingun që bën sikur e do, por i trembet si vampiri dritës së diellit. Ja pra, ora e së vërtetës është ulur këmbëkryq në këtë shesh. Kush e do Vettingun e vërtetë bashkohet me këtë rrugë, e vetmja rrugë për zgjedhje të lira e të ndershme: qeveri teknike.
Ne e dimë se pse Edi Rama nuk e bën këtë, pse Edi Rama refuzon ofertën qytetare për një zgjidhje me dialog.
Këto janë ankthet, frikat dhe arsyeja e vërtetë përse Edi Rama nuk pranon zgjedhje të lira e të ndershme. Por rruga e çmendur që kërkon ta fusë Shqipërinë është një rrugë qorre.
Demokracia e vërtetë nuk ka çmim dhe sot dua t’i them fare qartë Edi Ramës se në asnjë moment nuk do të lejojmë të marrësh peng demokracinë shqiptare për zgjedhje të lira e të ndershme. Ora po afron, shqiptarët janë të bashkuar nga ora në orë, nga dita në ditë. Ky bashkim popullor është garancia e vetme e Republikës së Re që po vjen. Asgjë nuk do na ndalë, Zoti është me të drejtën, Zoti është me Shqipërinë. Fitorja po afron. / Tirana Today
