Kryetari i Partisë Demokratike Lulzim Basha ka reaguar të hënën pas arrestimeve të ish-deputetëve socialistë Arben Ndoka dhe Arben Çuko dhe të dhjetëra të tjerëve ditën e diel.
“Peshku i madh i kësaj çështjeje quhet Vangjush Dako, të tjerët janë peshq të vegjël të cilët po serviren si pjesë e përpjekjes së Edi Ramës, Fatmir Xhafës dhe Donika Prelës për të shpëtuar peshkun e madh të kësaj dosjeje dhe për të shkatërruar provat që duhet të çojnë në arrestimin e Dakos”, tha Basha për gazetarët jashtë selisë së PD.
“Peshqit e vegjël që kanë arrestuar mbrëmë do të lirohen, akuzat do t’u lehtësohen, është e gjitha pjesë e një përpjekjeje të prokurorisë të kapur nga krimi, Edi Rama dhe Fatmir Xhafaj.”
Plani sipas Bashës është i qartë. “Duke i sërvirur opinionit publik dhe opinionit ndërkombëtar disa peshq të vegjël, të cilëve gjithsesi do t’u lehtësohen akuzat dhe do të lirohen, siç ka ndodhur deri më sot, të mbyllet hetimi për Dakon dhe të paktën 4 deputetë të tjerë socialistë si pjesë e kësaj dosjeje hetimore.”
