Nga Drejtoria e Policisë, kryedemokrati Basha tha para protestuesve të opozitës së bashkuar se nuk do të ndalen, deri sa të shporrin Ramën. Ai tha se qeveria ka në krye një njeri të korruptuar, i cili i ka orët e numëruara.
“Junta kriminale e Edi Ramës e shndërroi Tiranën në fushë-betejë. Mbrëmë u zhvillua beteja më e madhe e opozitës dhe shqiptarëve për liri dhe demokraci. Shqiptarët kërkuan Kushtetutën, shtetin e së drejtës, liritë themelore që iu takojnë.
Tirana mbrëmë u mbush me doza luftarake, me gaz helmues, një akt kriminal ky që mund ta bëjë vetëm një juntë. Rama dhe të tijtë iu përgjigjen me gaz popullit liridashës shqiptar. Por e kanë të kotë. Opozita dhe shqiptarët nuk ndalen së protestuari deri në arritjen e demokracisë së vërtetë. Rama ka marrë pushtetin me bandat kriminale dhe ka zaptuar çdo institucion, parlamentin, gjykatat, prokurorinë. Sot kemi parlament të krimit dhe njerëzit që ulen aty janë faqezinj që përfaqësojnë krimin, oligarkët e jo popullin e thjeshtë shqiptar”, deklaroi Basha.
Protestues të shumtë janë mbledhur përpara Drejtorisë së Policisë, duke kërkuar lirimin e personave të arrestuar në protestë. Ata kërkojnë lirimin e tyre, duke thënë se protestuesit po bëjnë burg politik.
