PD dhe LSI para pak kohësh trumbetonin për nisjen e protestave masive, për të shporrur kryeministrin Rama dhe kriminelët. Por mesa duket, planet kanë ndryshuar, pasi Basha sot nuk ka folur për protesta, dhe as nuk ka dhënë një datë.
Ndryshe nga ish-kryeministri Berisha, i cili ka kryefjalën e tij protestat masive, kreu demokrat nuk ka mbajtur këtë linjë. Një ndër zërat kritikë ndaj tij është Jozefina Topalli, e cila në një intervistë të dhënë një ditë më parë, nxori vrer ndaj tij, duke e cilësuar si një njeri i cili nuk ka pushtet për të qeverisur demokratët.
Por Basha ka zgjedhur që të mos i përgjigjet kritikëve, duke vijuar qetësisht me agjendën e tij. Ai ka mbledhur grupin parlamentar, në kuadër të nisjes së sesionit të ri në Kuvend pasditen e sotme.
“Çlirimi i qeverisjes nga krimi është prioritet mbi gjithçka. Bashkëqeverisja e Ramës me krimin po shkatërron gjithçka. Reforma në Drejtësi, e diskredituar. 11 gjyqtarë të paktën janë mbajtur jashtë rregullave. Të mbrojtur dhe lojtarë të Edi Ramës. Procesi i Vettingut është i korruptuar prej fillit.
Filli i sesionit do të jetë nisje e transparencës për gjyqtarët dhe prokurorët e korruptuar, që rrjeta e Vettingut nuk i kap, por i mban në drejtësi, ç’ka hedh në erë parimet kryesore të reformës. Synohet kapja e KLGJ dhe KLP, dhe është fare e thjesht. Gjithçka po shkon më keq për shkak të korrupsionit galopant. Evidentimi i koncesioneve korruptive, marrja e masave”, tha Basha.
