Kryetari i Partisë Demokratike, Lulzim Basha se Rama do të destabilizojë vendin me zgjedhjen e një prokurori politik. Në një deklaratë për median Basha tha se të hënën do të emërohet një Prokuror i Përgjithshëm politik, pa vetting, nga politikanë të korruptuar dhe të inkriminuar. Basha deklaroi se ky është fundi i Kushtetutës dhe i shtetit të së drejtës në Shqipëri.
Kryedemokrati deklaroi se Rama uzurpoi në mënyrë të dhunshme kompetencat që Kushtetuta ia jep Këshillit të Lartë të Prokurorisë.
“Rama uzurpoi në mënyrë të dhunshme kompetencat që Kushtetuta ia jep Këshillit të Lartë të Prokurorisë. Farsa që shqiptarët po shohin në Kuvendin e Shqipërisë është e paramenduar dhe e parapërgatitur me qëllim të caktuar.
Njerëzit e Edi Ramës janë nën hetim, Saimir Tahiri nën hetim për trafik ndërkombëtar droge, Vangjush Dako nen hetim për lidhje me krimin e organizuar, kompania e Qazim Sejdinit nën hetim për trafik droge. Zgjedhja e prokurorit politik ka një mision; të zhdukë të gjitha faktet që lidhin Edi Rama me drogën dhe krimin dhe të shpëtojë të gjithë kriminelët dhe qeveritarët e korruptuar që ekspozojnë Edi Ramën.
Kapja e Prokurorit është një akt që do të shkatërrojë drejtësinë në vend, do të shkatërrojë procesin politik demokratik dhe do të destabilizojë vendin. Shqipëria po sakrifikohet për të mbrojtur pushtetin dhe paratë e Edi Ramës dhe njerëzve të tij, dhe për të kënaqur etjen për pushtet dhe karrierë të patericave që e mbajnë Edi Ramën ende në këmbë,” deklaroi Basha.
Basha tha se edhe ndërkombëtarët duhet që të kuptojnë farsën e Ramës dhe realitetin se ku ndodhet Shqipëria.
“Shpresoj se edhe partnerët tanë të kuptojnë shpejt një të vërtetë të madhe. Arsyeja e rritjes së emigracionit të paligjshëm shqiptar dhe e krimit shqiptar në vendet e BE është politike, tolerimi dhe mbështetja që Edi Rama i ka bërë drogës dhe krimit, e cila ka forcuar krimin dhe i ka çuar shqiptarët në dëshpërimin për ta kërkuar të ardhmen diku tjetër. Emigracioni i paligjshëm dhe krimi nuk ndalen me masa teknike, por me zgjidhje politike: pastrimi i politikës nga krimi, që shqiptarëve t’u kthehet besimi tek vendi i tyre,” tha Basha.
Kryetari Basha I beri thirrje të gjithë shqiptarëve dhe demokratëve që bashkohet me protestën e PD-së para parlamentit ditën e hënë.
“Të hënën është detyrë e çdo qytetari që beson tek demokracia, që do të ndërtojë jetën në këtë vend dhe të mos shkojë refugjat, që do të jetojë me dinjitet dhe jo me lëmoshën e narkoqeverisë, të bashkohet me protestën tonë para parlamentit. Të hënën opozita parlamentare nuk do të lejojë të kthehet në fasadën e pushtetit të krimit, ndaj ftoj çdo qytetar që të mos qëndrojë spektator por ti bashkohet protestës tonë,” tha demokrati Basha.
